حبيبي! خطأ في التوجيه؟
من المعروف أن سوق العمل جاف نسبيا. إذا أنه متعلق بشكل مباشر بالمال.
الشي اللي ما عبقدر افهمو هوه انتشار كلمات الغزل في سوق العمل. يعني بتخبر شخص بئللك مرحبا يا غالي, كيفك يا بيك. وفي حالات تانية الموضوع فيا متطور. متل اهلين حبيبي, شلونك روحي, عيوني الى ما هنالك من كلمات غزل ترن في الاذن هنا وهناك…
الشي اللي ماعبقدر افهمو طاول طاول. انو هلكلمات تكاد تكون غير موجودة في بيوت الناس اللي بتوزع هلكلمات هنا وهناك. يعني مرتو لهلشخص مابتصور عندا علم انو هوه بيعرف هيك كلمات. اما الاولاد فتعودوا عالبهدلة.
طيب مو احسن انو نترك العمل لكلماتو ونعيد توزيع مشاعرنا الجياشة؟ مشان نطلع من هلكبت الغريب؟
فعلاً وأنا كمان لاحظت هالقصة ، وبصراحة بضحك لما بسمع هيك حكي … أنو أنتو ماعمتعنو هالكلمة وهادا كلو مجرد تمسيح جوخ وكذب ،، بقى لشو هالحكي ماااابعرف !
وفعلاً متل ماقلت ، يمكن تكون مرتو أو ولادو بعمرن ماسمعانين هالحكي ،، والحل أكيد أنه نعرف كيف نحكي وإيمتى ومع مين .. بس بتجي بالنهاية هي صايرة ثقافة مجتمعنا ، ومافيك تغيّر شي
بس لازم نضل نحكي ومانسكت عن الغلط ، مشان هيك شكراً
نحن بنحاول نعمل شي ونغير. مو ضروري انو يبين على وقتنا بجوز يبين وبجوز الجيل اللي بعدو. بس لازم نعمل شي